CEBU – Usa ka runner sa half-marathon sa California nakabutang og Guinness World Record sa dihang gikompleto niini ang lumba sulod sa 2 ka oras ug 19 ka minutos-samtang giduso ang iyang mga quintuplet sa stroller.
Niadtong Dominggo, misalmot si Chad Kempel sa half marathon sa Oakland Marathon samtang nagduso og stroller nga gisudlan sa iyang lima ka 4-anyos nga mga anak.
Gihinumdom ni Kempel ang maong higayon diin dungan nga moingon ang iyahang mga anak nga paspasan pa ang pagdagan.
Nagkatawa nga gahuna-huna si Kempel gumikan sa grabeng singot nga nasinati niini ingun man wala kini magdahum nga makalampus sa maong marathon.
Nahuman ni Kempel ang 13.1 ka milya nga dagan sulod sa 2 ka oras ug 19 ka minuto, gilabwan ang 2 ka oras ug 30 ka minuto nga gitakda sa Guinness World Records.
Nakabutang na kaniadto si Kempel og Guinness World Records sa pagdagan og 10k race ug full marathon samtang nagduso og lima ka mga bata.
Bisan paman sa mga record nga nakuha nagplano gihapon kini sa pagdagan sa dugang mga lumba sa umaabot – ug nilaum nga kuyog na ang iyang mga anak.
