CEBU – Gihinumdom sa mga Sugbuanon ang kabayanihan sa tanang mga beterano sa gubat adlawng Sabado, Abril 9, atol sa ika-80 nga paghandum sa Araw ng Kagitingan.
Nagkadaiyang mga panagtapok ang gihimo sa pipila ka bahin sa Metro Cebu aron pagsaulog sa Adlaw sa Kaisug bisan pa sa pagbundak sa ulan sayo sa buntag.
Sa dakbayan sa Sugbo, pipila ka mga beterano sa gubat nagtapok sa Plaza Independencia uban ang mga opisyal sa siyudad, kawani sa gobyerno ug mga personahe sa Armed Forces of the Philippines (AFP) ug Philippine Navy.
Gipangulohan ni Mayor Michael Rama ug Vice-Mayor Donaldo Hontiveros ang usa ka wreath laying ceremony aron sa paghinumdom sa nangamatay nga mga bayani sa Ikaduhang Gubat sa Kalibutan ug sa ubang mga gubat nga nahitabo sa Sugbo ug sa ubang bahin sa nasud.
Namahayag si Hontiveros, chairperson sa City Historical Affairs Commission (CHAC), nga kinahanglang hinumdoman kanunay ang kaisog.
Samtang namulong usab si Mayor Rama nga ang pagka-isog sa pagpasinguwan sayos kabuntagon sa adlawng Sabado usa lang ka gamay nga sakripisyo aron sa pagsaulog sa kinabuhi sa mga isog nga sundalo nga nakig-away alang sa nasud.
