CEBU – Gipasabot sa tigpamaba sa PDEA 7 nga si Leah Albiar Alcantara nga ang gipahigayon nila nga ‘destruction of illegal drugs’ kay nakabasi gayud sa balaud.
Kini ang pamahayag ni Albiar subay sa pipila ka mga pagduda sa publiko sa mao nila nga kalihokan.
Matud pa, nakalatid gayud kini sa Section 21 sa RA 9165, ingon man sa DDB Regulation No. 1 series of 2022, diin kini mahimong ma-access sa publiko sa ‘internet’.
Sa naasoy nga mga balaud nakalatid ang proseso nga ilahang ipahigayon sa pagsunog sa mga iligal nga drogas nga nasakmit sa mga anti-illegal drug operations.
Samtang, gipasabot usab ni Alcantara nga gipahigayon nila ang pagsunog sa iligal nga drogas sa funeral homes gumikan kay nagkinahanglan gayud ug thermal destruction nga mukabat sa 1000 degree centigrade ang kainiton arun nga ma-breakdown gayud ang mga chemicals.
Ang aso usab kay mag-agi ug ‘second level burning’ arun nga ang mugawas kay bugtong ‘fumes’ na lang ug wala na’y chemical components sa iligal nga drogas.
Sigon pa, kung maghisgot ug thermal destruction, maggamit kini ug crematorium diin bugtong ang punerarya lang ang anaa niini.
