CEBU – Mokabat sa P102 milyones nga kantidad sa shabu ang nasakmit sa mga operatiba sa Lapu-Lapu City Police Office Drug Enforcement and Intelligence Unit sa ilang buybust operation sa Barangay Poblacion, dakbayan sa Lapu-Lapu.
Giila ang mga dinakpan nga sila si Eric Felisilda, kwarentay sais anyos, ug Niel James Vallesquiña, baynte otso anyos, taga Langkaan, Dasmariñas, Cavite.
Sa exclusibong pakighinabi sa Bombo Radyo Cebu kang PLt.Colonel Mohammed Jamiri, ang hepe sa CDEU sa Lapu-Lapu City Police Station,matud niini nga ilang gilusad ang operasyon human makakuha og impormasyon gikan sa ilang nadakpan niadtong Hunyo 13 nga si ‘Madam Aya’ diin nakuhaan sila og 4 ka kilo nga shabu.
Matod niya nga gikan sa Manila ang tinubdan sa maong ilegal nga drugas ug gi-land trip kini gikan sa Luzon paingon sa Visayas region.
Nakuha gikan sa mga dinakpan ang 16 ka kilo nga shabu nga gisulod sa back pack, paper bag, sako ug tea bag.
Ang nahisgutang mga durugista anaa na karon sa kustodiya sa Lapu-Lapu City Police Office.
