CEBU – Clearing operation og dili demolition ang gihimong operasyon sa Carbon Public Market karong adlawa diin igo lang gipa-atras ang pipila ka tindahan aron mahawan ang dalan.
Kini ang pagpasabot ni Raquel Arce, ang pangu sa Prevention, Restoration, Order, Beautification and Enhancement (Probe) ug overseer sa maong merkado atol sa eksklusbong pakighinabi sa Bombo Radyo Cebu.
Gani, gibutyag ni Arce nga wala ray resistance o pagsupaka ang nahitabo sa maong operasyon gumikan daan nang gipahibaw ang mga tindahan nga maapektohan.
Apan sukwahi kini sa nahimong pamahayag ni Wilfred Miro , ang bise presidente sa Carbohanong Alyansa diin nagkanayon kini nga nakugang ang ubang mga tindera kinsang mga tindahan gidemolish gumikan wala sa plano ang gihimong pagpangguba sa ubang tindahan diin kasagaran pa niini giuna ang atop sa pagguba.
Hinungdan nga daghan silang nireklamo ngadto sa Module gumikan wala kini makapangandam ilabi na nga ang atop ang giuna pagtangtang ug pipila sa ilahang mga produkto ang dili naluwas.
