CEBU – Nibalik na sa clamping operations ang Cebu City Transportation Office (CCTO) batok sa mga sakyanan nga ilegal nga gi-parking sa tibuok gabii.
Nasayran nga bag-o lang gibalik ang pagpanakop sa mga sakyanan alang sa overnight parking kini human mahunong atol sa eleksiyon, apan karon, nag-operate na usab sa ikaduhang operasyon nga gipahigayon niadtong Martes sa gabii sa Hulyo 12, 2022.
Labing menos 22 ka mga sakyanan ang gi-clamp ug gi-impound sa wala madugay.
Lakip sa kadalanan nga gikonsiderar sa buhatan nga major areas of concern ang dalan Molave, Sitio Pangutana, atubangan sa Lahug Barangay Hall; Lower Nivel Hills, Salinas Drive; ug mga bahin sa Barangay Camputhaw, lakip ang Rosal Street, J.Solon, Gorordo, Llorente Street, ug G. Garcia Street.
Mokabat sa P1,500 ang bayranan sa mga makalapas sa illegal nga overnight parking aron ma-claim ang ilang mga sakyanan sa impounding area sa CCTO sa may dalan F. Ramos.
Aron malikayan kini nga mga silot, giawhag ang mga motorista nga magmatngon na lang sa mga lagda sa trapiko sa usa ka lugar sa dili pa moparking bisan asa sa tibuok gabii.
