CEBU – Gipaabot nga masugdan ang pagtukod sa Package 1 sa Cebu Bus Rapid Transit (BRT) project sulod sa unang 100 ka adlaw ni Presidente Ferdinand Marcos Jr.
Sa report gikan sa Cebu City Public Information Office, nagkanayon nga ang Department of Transportation (DOTr) kasamtangang nagsusi sa mga dokumento sa tulo ka bidders alang sa proyekto.
Nalakip sa Package 1 ang Osmeña Blvd., gikan sa Cebu Provincial Capitol ug paingon sa Cebu South Bus Terminal (CSBT) sa may N. Bacalso Ave.
Matod pa ni Engineer Roberto Varquez, BRT focal person sa dakbayan sa Sugbo, nga nagpaabot sila sa report gikan sa special bids and awards committee sa DOTr.
Gibutyag usab ni Varquez, nga gusto ni DOTr Secretary Jaime Bautista nga ma-award ang proyekto sa makadaog nga bidder sulod sa unang 100 ka adlaw ni Marcos Jr.
