CEBU – Patay ang usa ka 29-anyos nga engineer nga nagtrabaho sa usa ka hotel sa Sitio Sampaguita, Barangay Tejero pasado alas 7 sa gabii gahapong adlawa Lunes, Agosto 15, 2022.
Giila ni Police Staff Sergeant Epifanio Comedido sa Police Station 3 sa Cebu City Police Station ang biktima nga si Jonel Resco, nga taga Barangay Cansaganay sa lungsod sa Daram, Western Samar.
Samtang ang suspek giila nga si Aldrich Mansanades, kinsa giingong kanhi kauban sa trabaho sa biktima.
Padayun nga gipatigayon ang hot pursuit operation para masakmit ang suspek nga niikyas human gipusil ang biktima sa iyang giabangan nga balay.
Nakaangkon og tulo ka samad pinusilan sa managlahing parte sa lawas ang biktima nga miresulta sa iyang kamatayon.
Kasamtangang padayun nga nagsusi ang mga kapulisan sa motibo sa pagpamusil.
