CEBU – Hingpit na nga nabayran sa kagamhanan sa dakbayan sa Sugbo ang 27-anyos nga loan niini alang sa pagpalambo sa South Road Properties ug makonsiderar na nga walay utang sa SRP.
Gibutyag ni Atty. Jerome Castillo, ang special assistance for fiscal reforms ni Mayor Mike Rama, nga bag-o lang mibayad sa kinatibuk-ang P904,898,606.27 ang kagamhanan sa dakbayan alang sa utang niini sa SRP.
Gilangkoban sa maong ang katapusang semi-annual amortization sa siyudad nga nagkantidad og P145,631,585.45 nga nabayran niadtong Agosto 19 ug ang loan balance niini nga P759,267,020.82 nga nautang ug nabayran niadtong Agosto 23.
Base sa impormasyon nga mosunod ang pag-isyu sa certificate of full payment ug ang mga top executives sa Land Bank of the Philippines (LBP) ang gikatakdang mohatod sa certificate ngadto sa dakbayan sa Sugbo ug ihatag kini ngadto sa Mayor Rama karong Septiyembre 16, 2022.
Gipaambit usab sa opisyal nga naggikan ang kwarta nga gibayad sa utang sa sa nahabilin nga kita sa dakbayan gikan sa pagbaligya sa mga parsela sa SRP niadtong 2015.
