CEBU – Na-confine karon sa tambalanan ang usa ka panadero nga taga lungsod sa Borbon kini human gidunggab sa makadaghang higayon niadtong Lunes, Septiyembre 5.
Gibutyag sa mga kapolisan sa Borbon niingon nga ang panadero nakaangkon og daghang samad dinunggaban samtang nitambong og gamay nga disko sa Sitio Pitogo, Barangay Poblacion pasado alas 11 sa gabii.
Giila ang biktima nga si Jesse Luceno, 32.
Base sa inisyal nga findings, ang insidente nitumaw human gikatahong gibugalbugalan sa biktima ang pipila ka mga disco-goers tungod sa ilang sayop nga mga lihok sa sayaw, diin ang mga suspek nasuko.
Hinungdan nga sa dihang nipauli na si Luceno, gibabagan siya sa tulo ka mga lalaki dayon gidunggab sa nagkadaiyang parte sa iyang lawas.
Giila ug nasikop sa kapolisan ang tulo ka mga suspek, nga sila si Pablo Doronio Jr., Ezel Doronio, ug Bernard James Modequillo.
Kinsa anaa na karon sa kustodiya sa Borbon Police Station samtang nagpaabot sa pagpasaka og mga reklamong frustrated homicide batok kanila.
