CEBU – Kasamtangang gi-backtrack sa kapolisan sa dakbayan sa Naga ang mga buluhaton sa magtutudlo sa publikong tunghaan una pa kini gidunggab ug gibiyaan nga patay sulod sa lawak sa Inoburan Elementary School sa Barangay Inoburan, dakbayan sa Naga pasado ala 1 sa hapon niadtong Domingo, Okt. 16, 2022.
Kinsa giila ni Police Lieutenant Colonel Junnel Caadlawon, hepe sa Naga City Police Station, ang biktima nga si June Leo Pañares, hingkod ang edad, residente sa Barangay Tinaan sa dakbayan sa Naga.
Kung diin si Pañares gidunggab sa makadaghang higayon sa lain-laing bahin sa iyang lawas gamit ang kutsilyo nga napalgan usab sa crime scene uban ang gunting.
Matod ni Caadlawon nga katapusan nakig-estorya ang biktima sa iyang kaubang magtutudlo nga si Simon Cereño mga alas 7 sa gabii niadtong Sabado, Okt. 15
Dugang pa, nga si Cereño nitug-an sa kapulisan nga nakig-chat ang biktima ug nipahibawo kaniya nga naa siya sa tunghaan uban sa mga 7/11 boys.
Sa inisyal nga impormasyon, si Caadlawon niingon nga ila pang gi-backtrack kung kinsa ang kauban sa biktima sa wa pa mahitabo ang insidente.
Nakuha nila ang kopya sa security camera gikan sa usa ka establisemento diin nakita si Pañares mga alas 6 hangtod alas 7 sa gabii sa Sábado.
Samtang sa habig ni City of Naga Mayor Valdemar Chiong nagbutang kini og P50,000 nga bounty alang sa bisan unsang impormasyon nga makatabang sa pagpangita sa sad-an sa pagpatay kang Jhun Leo Pañares, usa ka public teacher sa Naga Integrated Center for Science, Technology, Culture, and Arts sa Barangay Inoburan.
