CEBU – Mokabat sa 330 ka pamilya ang nawad-an og pinuy-anan human niulbo ang sunog sa Sitio Wangyu, Barangay Mambaling sa dakbayan sa Sugbo ganihang kaadlawon Domingo, Disyembre 4.
Sa report ni Fire Officer 3 (FO3) Emerson Arceo, imbestigador sa Cebu City Fire Station, iyahanag gibutyag nga ang kapin sa usa ka oras nga sunog niugdaw og 140 ka mga panimalay ug 10 ka uban pa ang naugdaw. Ang dapit sa sunog naglangkob sa usa ka dapit sa 2,500 square meters.
Gibanabana nga moabot sa P3,750,000 ang danyos sa sunog.
Matod ni Arceo, usa ka residente nga giilang si Jhunrey Silio, 23, nakaangkon og samad sa tuo nga paa ug tuo nga tiil.
Apan walay bisan usa sa mga bombero ang naangol samtang naningkamot sa pagpawong sa kalayo.
Base sa iyang inisyal nga imbestigasyon, matod ni Arceo, nasubay nga nagsugod ang sunog sa pinuy-anan sa pamilyang Cenabre, Hinuon, wa pa niya matino ang hinungdan niini.
Dugang pa, nga na-report ang sunog ala 1:44 sa kaadlawon ug ang mga bombero naabot sa lugar ala 1:49 sa kaadlawon.
Giisa ngadto sa second alarm ang sunog mga alas 2:07 sa kaadlawon una kini nakontrolar alas 3:07 sa kaadlawon.
