CEBU CITY-Mas gipadali na ang paglukat ug ticket ang mga pasahero nga nagplanong mobiyahe sa mga lungsod sa habagatang bahin sa Sugbo pinaagi sa Cebu South Bus Terminal gumikan pwedi nang mo-book og mga tiket online.
Kini ang gibutyag ni Carmen Quijano, pangulo sa Cebu South Bus terminal, niingon nga ang Provincial Government, nga nag-operate sa terminal nga nahimutang sa N. Bacalso Avenue sa dakbayan sa Sugbo, nakigsabot sa pribadong kompanya nga Topline alang sa paggamit sa “Topline Travel App
Gitugotan sa maong app ang mga pasahero nga makapalit mga tiket online gamit ang ilang mga smartphone gawas niana pinaagi sa app, ang mga pasahero mahimo usab nga susihon ang iskedyul sa mga biyahe sa bus, o ang mga ruta nga magamit.
Mamahimo usab nga cashless ang pagbayad sa maong ticket pinaagi sa E-money o Gcash ug imu lang ipakita ang QR Code sa terminal paghuman nimog bayad.
Dugang ni Quijano nga dili pa ang tanan nga mga tawo pamilyar sa app, apan gidasig niya ang mga nagplano sa pagbiyahe nga maghimo mga advanced bookings aron masiguro ang usa ka slot sa ilang gusto nga mga iskedyul.
