TABUELAN CEBU-Nagpakamatay ang 48-anyos nga lalaki nga giakusahan nga nitigbas sa iyang asawa sa lungsod sa Tabuelan, Cebu niadtong Mayo 30, 2023.
Gikompirmar sa kapulisan sa Tabuelan nga si Homer Olivo namatay mga alas 4 sa hapon, Miyerkules, Mayo 31, halos usa ka adlaw human nila siya gidakop tungod sa pagtigbas patay sa iyang asawa, nga si Janice Olivo.
Matud pa ni Police Captain Gerald Casalme, hepe sa Tabuelan Police Station, nga basi sa ilahang imbistigasyon nagpakita nga si Homer posibling naghikog kini.
Ang suspek gikatahong misaka sa kisame sa kasilyas sa detention cell ug dayon miambak gikan sa bungbong nga nag una ang iyahang ulo, gidala sa kapolisan si Homer sa tambalanan apan gideklarar kini nga dead on arrival tungod sa mga samad nga naangkon sa iyang ulo.
Una niini, si Homer nasikop pasado alas 10 sa gabii niadtong Mayo 30 dihang iyang gidunggab ug gitigbas si Janice sa makadaghang higayon sa ilang balay sa Sitio Ibabao, Brgy. Poblacion sa Tabuelan.
Base sa imbestigasyon, ang bana niangkon nga nakahimo sa maong linuog nga krimen, nga nahitabo pasado alas 9 sa gabii tungod sa selos.
Ang magtiayon dayag nga adunay init nga panaglalis sa wala pa ang insidente, gikatahong nagduda si Homer nga adunay gikarelasyon si Janice.
