PROVINCE OF CEBU-Patay ang usa ka construction workerug ug laing 11 ka tawo ang ‘nahilo’ sa pagkaon sa litson sa Sitio Mohon, Barangay Tutay, lungsod sa Pinamungajan, alas 5:40 sa buntag Dominggo, Hulyo 9, 2023.
Ang namatay giila sa kapulisan nga si Ryan Mendoza Alquizar, 34, ug nagpuyo sa nahisgutang lugar samtang nalakip sa nahilo mao ang iyang anak nga si Rheanna Eve Bayotas Alquizar, 3.
Nahilo usab ang iyang mga silingan nga sila si Jerry Sarzuelo Pasignajen, Juliana Bayotas Pasignajen, 7; Stacey Gabriel Bayotas Pasignajen, 3; Juana Mainit Vilos, 71, Alexander Romarate Vilos, 9; Vernie Bayotas Villarin, 46; Samantha Nicole Bayotas Villarin, 18, Cunnah Angeline Bayotas Villarin, 15; Berlyn Son Guanzon, 27, dalaga; ug Jannen Bayotas Trinidad, 19.
Nagkanayon si Major Gilfred Baroman, hepe sa Pinamungajan Police Station nga, nga sayo silang gipahibalo kabahin sa food poisoning diin ang mga biktima nadala sa Pinamungajan District Hospital.
Sumala niya nga patay na ang biktima sa ilang pag-abot sa ospital.
Usa sa silingang mga biktima usab nga si Jerry Pasignajen uban sa namatay, nangutang og litson sa ilang trabahoan sa dakbayan sa Lapu-Lapu, Sabado sa udto, Hulyo 8, 2023.
Tungod kay half day ra ang ilang trabaho, nanguli sila sa ilang lungsod dala ang litson.
Sila si Ryan ug Jerry mikuhag tagsa ka kilo nga litson gikan sa kauban sa trabaho.
Laing kauban nilang construction workers nga taga lungsod sa Aloguinsan ang niutang usab sa litson.
Samtang didto na sila sa ilang panimalay, giagda nila sa pagkaon sa litson ang kabanay ug silingan.
Apan pagka-alas 7:00 sa gabii hangtud sa alas 8:00 sa gabii sa Sabado, nagsugod na og sakit ang ilang tiyan.
Tungod niini, dali silang gidala sa kabanay sa tambalanan apan si Ryan Alquizar kalit nga nahagba ug nakabsan sa kinabuhi.
Nihangyo sila si Baroman nga ipa-autopsy ang lawas sa biktima aron masuta unsay namatyan niini.
Ang ubang mga biktima nakagawas na sa tambalanan sa Dominggo sa buntag human nahatagan og tambal sa mga doktor.
Sa pikas bahin, ang doctor nga si Dr. Terisita Bucado dili pa makaingon nga food poisoning ba ang hinungdan hangtud wala napaubos sa eksaminasyon ang namatay ug ang nakaong litson sa mga biktima.
Gipasabot ni Baroman nga paabuton nila ang resulta sa laboratory samples aron matino kon food handling o adunay nakasagol nga kemikal.
