CEBU CITY – Nagpadayon sa pagpangita ang kapolisan sa lungsod sa Argao habagatang bahin sa Sugbo sa usa barangay kagawad, nga gipasanginlan nga nipusil sa usa ka tawo niadtong Domingo sa gabii, Agosto 6, 2023.
Ang pagpamusil nahitabo sa waiting shed sa Brgy. Bala-as, Argao mga alas 11:13 sa gabii nga nakasamad sa usa ka 54-anyos nga lalaki.
Giila ang biktima nga si Rolando Abrigana kinsa niadtong Lunes, nagpabiling naka-confine sa tambalanan sa Argao.
Sa laing bahin, ang suspek giila nga si Bala-as Barangay kagawad Jerfil Cabanas, 32, taga Argao.
Matud pa sa kapulisan, nga nakadawat sila og taho nga adunay nahitabong pagpamusil sa waiting shed sa Brgy. Bala-as.
Sa ilang pag-abot sa maong dapit, ang mga saksi nitug-an kanila nga ang biktima daling gidala sa tambalanan.
Dugang pa, nga ang gunman usa ka barangay kagawad, kinsa ilang giila nga si Cabanas.
Nasayran nga nag-atang sila si Abrigana ug Cabanas og masakyan sa waiting shed padulong sa trabahoan samtang ang naulahi nagpatrolya sa lugar, kauban ang ubang mga opisyal ug trabahante sa barangay.
Matod sa labing menos duha ka mga saksi, nga sila si Abrigana ug Cabanas kalit nga nalambigit sa init nga panaglalis nga sa ulahi nahibaw-an sa kapolisan nga nitumaw kini human giingong giinsulto sa biktima ang suspek.
Ang suspek nga si Cabanas nipauli apan nibalik sa waiting shed nga nagbitbit og armas nga wala pa matinong kalibre dayon mipaulan og duha ka mga buto ngadto kang Abrigana kinsa nakaangkon og samad pinusilan sa iyang tiyan.
Nisuway paggukod ang biktima nga si Abrigana kang Cabanas gamit ang bolo apan pakyas kini.
Padayon pa ang hot pursuit operation batok kang Cabanas.
