MANDAUE CITY-Milayat ang usa ka batang babaye gikan sa 4th floor sa tunghaan sa Canduman National High School sa dakbayan sa Mandaue kagahapong adlawa, Setyembre 6, 2023.
Nihagsa ang tinun-an sa quadrangle sa tunghaan nga miresulta sa iyahang naangkon nga mga bali sa tiil.
Sa pakighinabi sa Bombo Radyo Cebu News Team kang Principal Flora R. Ylanan, giangkon niini nga wala kini napangandaman nga panghitabo tungod sa pagtuo nga hapsay ug malinawon ang ilahang pagsugod sa klase diin nagpahigayon pa sila og mga orientation subay sa handbook nga gisunod sa eskwelahan.
Dugang pa ni Ylanan nga wala sab nila nakitaan og mga senyales ang estudyante nga mabuhat ang maong makasubo nga gidangatan sa bata.
Subay sa maong panghitabo, gipahinumduman sa Principal ang mga magtutudlo nga pakusgan ang ‘constant reminder’ ngadto sa mga tinun-an kabahin sa mga posibleng resulta sa mga desisyon niini hilabi na sa panahon karon nga kadaghanan sa mga bag-ong tubo dili makahimo og sulti sa ilahang mga gipang-agian o mga yangungo ngadto sa ilahang mga ginikanan.
