CEBU CITY-Pagrehistro sa mga bike plano nga himuong libre sa Dakbayan sa Sugbo apan kadtong dili rehistrado nga mga siklista pamultahon sa higayon nga magsugod na ang rehistrasyon, giklaro sa Sugbo Bike Lanes Board.
Kini agig tubag sa mga komento ug reaksyon sa mga biker ug ubang mga Sugbuanon ug netizens dihang nangayo og opinyon sa publiko ang SBLB kon uyon ba sila niini.
Ang mandatory registration ug licensing sa mga biseklita sa dakbayan sa Sugbo gihimo nunot sa pagpasar sa City Ordinance 2408, matod sa Public Information Office sa dakbayan.
Mipadayag ang SBLB executive director Bernard Maraasin nga anaa pa sila sa proseso sa pagkumbinser sa mas daghang bikers nga magparehistro sa ilahang mga bike.
Gipasabot ni Maraasin nga gikinahanglan ang mandatory registration sa mga biseklita isip paagi aron makabaton og kaugalingong database ang siyudad sa mga biker.
Gamiton ang database nga makolekta sa siyudad sa paghimo og dugang mga programa kalabot sa aktibong transportasyon.
Giawhag ang mga nagpuyo sa gawas sa dakbayan sa Sugbo sa pagrehistro.
Sa higayon nga masugdan na nila ang hingpit nga pagpatuman sa ordinansa, ang mga bikers nga wala pa marehistro sa wala pa ang siyudad mahimong dakpon ug pamultahon.
