CEBU CITY-Gituohan sa usa ka Taxation Professor nga ang buhis ang usa sa mga rason sa pagsaka sa presyo sa lana sa nasud nga naka-apekto sa tanang aspeto sa kinabuhi sa matag Pilipino.
Gipasabot ni Atty. Jonathan Capanas, nga ang mga produkto sa lana sa Pilipinas kay inangkat sa laing nasud hinungdan nga sa higayon nga makasulod na kini dinhi sa nasud, patungan na kini og 12% nga Value Added Tax (VAT) ug excise tax, rason nga mosaka gayud ang presyo niini.
Matud pa, lisod kini nga buhi-an sa gobyerno gumikan kay dako kini sila og kita pinaagi sa buhis sa mga produkto sa lana diin ang matag litro kay adunay excise tax.
Ang pagsaka sa presyo sa lana kay ‘inflationary’ hinungdan nga sa higayon nga mosaka kini, hayan, mo mahal usab ang presyo sa uban pang mga palaliton.
Samtang, napanglantawan usab ni Atty. Capanas nga dili na epektibo ang Oil Deregulation Law gumikan kay dili subsob ang monitoring sa gobyerno, ingon man nga kontrolado sa gihapon sa industriya sa lana ang presyo ug sagad sa mga reklamo kay hilabihan ka mahal ang presyo pag-abot sa Pilipinas gumikan sa ka dako sa buhisan, bisan pa man nga dili ingon ka dako ang presyo sa lana gikan sa tinubdan.
Subay niini, gibutyag ni Atty. Capanas nga angayan nang rebyohon ang maong balaod, ingon man ang pagpatuman niini nga gikinahanglan nang panghingusgan usab sa gobyerno.
Gikinahanglan usab, matud pa, rebyohon ang buhisan sa produkto sa lana gumikan kay hilabihan kini ka dako nga mao ang usa sa mga rason sa makanunayon nga pagsaka sa presyo niini.
