CEBU CITY-Nalakip sa listahan sa mga ‘areas of concern’ ang duha ka barangay sa Sugbo sumala sa Commission on Elections (Comelec).
Ang maong listahan, nagsilbing pagpangandam sa nagsingabot nga Barangay ug Sangunniang Kabataan Elections (BSKE) karong umaabot nga Oktubre 30.
Ang naasoy nga duha ka barangay anaa nahimutang sa habagatang bahin sa Sugbo nga mao ang ang South Poblacion ug Magsico sa lungsod sa San Fernando, nga ubos sa yellow category.
Basi sa color-coding system sa Comelec, ang yellow nagpasabot nga areas of concern, nga nagpakita nga ang maong lugar adunay kasaysayan sa election-related incidents sa miaging duha ka piniliay.
Sa pikas bahin, ang green mao ang mga lugar nga walay bisan unsang isyu sa seguridad.
Samtang, ang orange nagpaila sa mga ‘places of immediate concern’ nga adunay seryoso nga armadong hulga nga gipahinabo sa malapasong mga kriminal, samtang ang pula nagpasabot nga adunay ‘grave security concern’ ang maong dapit.
Subay sa maong balita, sa 42,001 ka barangay sa Pilipinas, 242 ang giklasipikar nga pula, 1,257 ang orange, samtang 1,077 ang yellow.
