CEBU CITY-Gipasakaan na og kaso ang usa ka lalaki human nisuway pagdisplay sa tarpaulin batok sa iyang kanhi uyab nga giingong “cheater.”
Giila ang suspek nga si “Dodong”, 32 anyos, usa ka call center agent, ug residente sa Brgy. Cambaro, Mandaue City.
Matod ni Police Lieutenant Gaudioso T. Morte, ang OIC Operation sa Regional Anti-Cybercrime Offices sa Central Visayas, makita sa tarpaulin ang panag-estorya sa iyang kanhi uyab nga gidudahang may kaubang laing lalaki.
Apil niini ang hubo nga lawas sa babaye ug usa ka dakong tatak nga “cheater” sa duha ka tarpaulin.
Usab, gusto sa babaye nga bulagan ang lalaki apan wala siya mosugot.
Kini ang hinungdan nga giplanohan sa suspek nga i-display ang tarpaulin sa IT Park Cebu ug sa basketball court duol sa panimalay sa biktima.
Busa nangayo og tabang ang biktima sa Regional Anti-Cyber Crime Unit-7 aron masikop ang suspek pinaagi sa entrapment operation.
