CEBU CITY-Nadakpan ang giingong hitman sa nahitabong pagpamusil niadtong Pebrero 1, 2024 uban ang laing duha pa ka kauban niini sa gipahigayon nga buy-bust operation sa Sawang Calero Police Station 6 sa Taboan, Barangay San Nicolas Proper sa dakbayan sa Sugbo.
Ang mga suspetsado giila nga sila si Oneil Llatona, nga mao’y target sa operation ug nabutang sa listahan isip high value individual, 22-anyos nga taga Sitio Urasi, Barangay Sambag 1, ning dakbayan sa Sugbo.
Samtang ang duha ka laing nadakpan nga kauban niini nga sila si Fernando Alilin Lariosa, 48-anyos ug Adrian Ducay Adolfo, 18-anyos.
Nasayran nga nakuhaan si Oniel og mga pakete sa gituohang shabu nga mo timbang sa 20.12 gramos nga mobalor og P136,816 ug usa ka kalibre 45 nga pistola.
Samtang tag lima ka gramo nga shabu ang nakuha nilang Lariosa ug Ducay nga adunay kantidad nga tag P34,000.
Matod pa ni Police Major Francis Renz Talosig nga si Llatona gitudlo nga mao’y responsabli usab sa pagpamusil sa iyang area hinungdan nga usa sa iyang mga giatubang nga kaso ug gihikay sa kapulisan mao ang kasong Frustrated Homicide.
