CEBU CITY-Gihulagway sa usa ka human rights lawyer ug aktibista nga delikado ang giduso karun nga Charter Change itandi sa mga nakalabay nga administrasyon.
Gibutyag ni Atty. Neri Colmenares, Bayan Muna Partylist Chairperson, nga ang Cha-Cha sa Marcos administration kay “well-funded” ug hilabihan ka “organized”, hinungdan nga makita ang ka seryoso sa gobyerno sa pagtuman sa ilahang kagustohan nga pag-usab sa Batakang Balaud.
Matud pa, usa sa mga kalahi-an sa giduso karun nga Charter Change kay gigamit ang tulo ka mga pamaagi, nga mao ang Constitutional Assembly, Constitutional Convention ug ang People’s Initiative, butang nga hilabihan ka tataw ang pag-insistir sa gobyerno nga kini mapatuman.
Giingong ang problema mao ang paggamit sa public funds ngadto na sa mga marginalized sector arun nga mopirma sa gipatuyok karun nga People’s Initiative.
Gipasabot ni Atty. Colmenares nga mahimo man nga gamiton ang public funds alang sa paghatag og ayuda sa mga kabus kung adunay mga katalagman o kalamidad diin kinahanglan kini silang tabangan sa gobyerno, apan kung gumikan lang sa pagduso sa Charter Change, giingong dili kini makatarunganon.
Gidugang usab niini nga walay kamatuoran nga ang pagpasulod sa mga foreign investors mao ang makapalambo sa ekonomiya sa Pilipinas.
Nagkanayon si Colmenares nga ang pagwagtang sa korapsyon mao’y yawi sa paglambo sa nasud ug dili ang pagpasulod sa mga foreign investors.
