MANDAUE CITY, CEBU-Dili na tugotan nga makatukod og balik sa ilang mga balay sa lugar nga nasunogan ang mga residente sa Sityo Under the Bridge.
Kini ang gitino ni Looc Barangay kapitan Raul Cabahug, atul sa pakighinabi kaniya sa Bombo Newsteam, ug gidugang nga kini mando sa Siyudad.
Dugang pa ni Cabahug, nga ang Mandaue City Government nakahukom nga i-reblock ang lugar nga nasunogan ug magtukod og temporaryo nga kapuy-an aron kabalhinan sa mga nabiktima sa sunog.
Kung diin ang relocation site anha gihapon sa Barangay Looc, nga nahimutang kilid sa University of Cebu Lapu-Lapu Mandaue Campus (UCLM), subay sa dalan paingon sa Barangay Opao.
Una nang niingon si Cabahug nga ang Sitio Under the Bridge nahimutang sa usa ka nationally owned property nga gikonsiderar nga danger zone.
Sa pagkakaron, ang mga biktima sa sunog nakakaplag og temporaryong kapuy-an sa Looc Gymnasium ug Cesar Cabahug Elementary School nga nahimutang kilid sa gym.
