Gi-awhag ni Ukraine President Volodomyr Zelensky ang China nga motambong sa panaghisgot sa kalinaw sa Switzerland sa Hunyo.
Kini human ang Presidente sa China nga si Xi Jinping giingong nipasalig kaniya sa usa ka phone call nga gisuportahan sa Beijing ang teritoryal nga integridad sa Ukraine bisan og wala maghisgot si Zelensky kung kanus-a nahitabo ang maong panag-istoryahanay tali niya ug sa Chinese President.
Ang katapusan nga higayon nga ang duha ka mga lider nakigsulti pinaagi sa telepono kaniadtong Abril sa miaging tuig.
Sukad usab nga gisulong sa mga pwersa sa Russia ang Ukraine kaniadtong Pebrero 2022, wala gayud gikondenar sa China ang Russia, gani nagpabilin kini nga neutral sa nagpadayon nga panagbangi.
Gipahibalo usab ni Zelensky nga gusto niya nga makigtambayayong sa mga nasud sama sa China nga adunay impluwensya sa Russia.
Matod niya, ang pag-apil sa global players sama sa China hinungdanon ug kung daghan pa sa iyang mga nasud ang modapig kanila, ang Russia mapugos sa paglihok.
Sa pagkakaron, wala pay pasalig ang China kon magpadala ba kini og representante sa peace process alang sa Ukraine, apan si Chinese Ambassador to Switzerland Wang Shihting niingon niadtong Marso nga gikonsiderar sa ilang gobyerno ang pagtambong sa maong peace talks.
