Misang-at og Senate Resolution si Senador Raffy Tulfo nga nagtinguha sa pag-imbestigar sa abnormal nga pagdaghan sa mga Chinese nationals sa Multinational village sa Parañaque City.
Sa gisang-at nga Senate Resolution (SR) No. 1043, ang Senador miingon nga ang mga residente ug mga tag-iya sa balay sa Multinational village nagpadayon sa pagreklamo bahin sa pagdaghan sa mga Intsik sa ilang komunidad sukad niadtong 2019 sa dihang ang mga Chinese nga trabahante nga nagtrabaho sa mga POGOs og dayong nagsugod sa pagbalhin sa ilang baryo.
Matod niini nga morag teritoryo sa China ang ilang subdivision.
Dugang niya nga nagduda usab ang mga residente nga posibleng adunay bag-ong POGO nga naglihok sulod sa ilang barangay.
Gihangyo sa Senador ang Presidential Anti-Organized Crime Task Force, National Bureau of Investigation ug Bureau of Immigration nga imbestigahan ang estado ug kalihokan sa mga Chinese national sa Multinational Village.
Ang nahisgutang mga ahensya nisaad nga ila kining aksyunan dayon.
Kahinumduman, niadtong Mayo 2, usa ka grupo lakip ang 10 ka Chinese nationals ang gidakop sulod sa usa ka balay sa Multinational village tungod sa paglapas sa Anti-Trafficking in Persons Act, Alien Registration Act ug Cybercrime Prevention Act.
Dugang pa, kaniadtong Marso 2020, ang Senate Blue Ribbon Committee nagpahigayon usab usa ka pagpangutana kalabot sa kwestyonableng pagdaghan sa mga Chinese nationals sa Multinational village apan naapsan kini sa COVID-19 pandemic.
