CEBU CITY-Mupadala karong semanahuna sa kapin P3 milyones nga financial assistance sa kagamhanan sa dakbayan sa Sugbo alang sa lungsod sa La Castellana ug Canlaon City sa Negros Island, nga naapektuhan sa pagbuto sa bulkan sa Kanlaon niadtong Hunyo 3, 2024.
Nipahibawo si Cebu City Acting Mayor Raymond Alvin Garcia sa usa ka press conference niadtong Huwebes, Hunyo 20, nga iya nang gimanduan ang city treasurer’s office, accounting office, ug budget office sa pag-andam sa mga tseke sa kwarta.
Dugang ni Garcia nga iyang gikontak ang duha ka local government units (LGUs) nga makadawat sa mga hinabang, ug nipadayag sila sa ilang pasalamat.
Gipaubos sa Cebu City Council ang financial assistance gikan sa P7 milyones ngadto sa P3 milyones atol sa ilang sesyon niadtong Hunyo 19 nga giaprobahan ang P1 milyones nga hinabang alang sa La Castellana sa Negros Occidental ug P2 milyones sa Canlaon City sa Negros Oriental lamang.
Si Garcia, kinsa unang misaad og P7 milyones nga hinabang alang sa unom ka mga lungsod sa Negros Island, niingon nga ubos sa balaod, kadto lang nagdeklarar og state of calamity ang kwalipikado nga makadawat sa cash aid.
Dugang ni Garcia nga ang La Castellana ug Canlaon City lang ang nakab-ot sa sukdanan sa hinabang, sanglit sila ra ang mga local government units (LGUs) nga nideklarar og state of calamity.
Mipahayag usab si Cebu City Councilor Joel Garganera, kinsa maoy chairman sa committee on environment, Miyerkules, Hunyo 19, niingon nga ang pundo maggikan sa Local Disaster Risk Reduction and Management Fund-Trust Fund 2022.
Ang gahin gibase sa gikataho nga danyos nga P11.3 milyones sa La Castellana ug P93.5 milyones sa Canlaon City.
Dugang ni Garganera nga ang Cebu City Disaster Risk Reduction and Management Council nakahukom nga dili na i-apod-apod ang nahabilin nga pundo sa ubang mga lungsod, pagsiguro nga ang P3 milyon nga hinabang gitagana alang sa duha ka mga lokalidad.
