CARMEN, CEBU-Gianod sa kusog nga tubig ang usa ka pick-up truck nga adunay sakay nga 17 ka indibidwal sa suba sa Brgy. Cantumog, lungsod sa Carmen amihanang bahin sa Sugbo gahapon sa hapon, Hulyo 8, 2024.
Sa 17 ka mga pasahero, 10 ang naluwas sa kalit nga kusog nga pag-agas sa tubig lakip niini ang driver sa maong pick-up trak, samtang ang nahabilin nga pito ka mga indibidwal ang naanod.
Basi sa imbistigasyon nga gikan sa usa ka resort ang mga indibidwal ug mopauli na kini, apan tungod sa pagbunok sa uwan, kalit nga niawas ang suba paingon sa barangay road nga gi-agian sa maong trak.
Lakip sa naanod sa kusog nga agas sa tubig mao ang nakuha na nga patyang lawas sa 12-anyos nga batang babaye nga si Aishie Hermoso.
Samtang ang lain pa nga unom ka indibidwal nga padayon nga gipangita mao sila si Mike Stanley Tungal, 15-anyos nga lalaki, Arshane Bejoc,11-anyos nga babaye, ang bag-ong kasal nga magtiayon nga sila si Elmer Costan ug si Rhesamie Ypil Costan nga gituohang mabdos ug si Nathaniel Lozano, 12-anyos, ingon man si Clarrise Ypil, 13-anyos nga batang babaye.
Sa pakighinabi sa Bombo Radyo Cebu kang Konsehal Vinancio Bejoc, kinsang konsehal sa Lower Natimao-an sa naasoy nga lungsod nga temporaryong gihunong ang rescue operation pasado alas 10 sa gabii tungod sa dili na sab luwas ang lugar ug ipadayon nila kini unyang alas 5 sa buntag, Hulyo 9, 2024.
