UNITED STATES-Gi-awhag sa 17 ka ntop democrats si US President Joe Biden nga suspindihon ang iyang kampanya pag-usab sa eleksyon ug pag-atras gikan sa 2024 Presidential race.
Kini nunot sa dayag nga huyang nga performance ni Biden sa miaging presidential debate batok sa iyang higpit nga karibal nga si kanhi US Pres. Donald Trump.
Gidugang sa kabalaka nga may kalabotan sa kahimsog sa 81-anyos nga si Biden nga ipadayon ang iyang kandidatura mao ang iyang talagsaong sayop sa iyang pakigpulong sa NATO summit sa Washington, D.C. lakip ang iyang pagpaila sa Presidente sa Ukraine nga si Volodymyr Zelenskiy isip “Presidente Putin” apan iya dayon kining gitul-id samtang sa usa ka press conference gitawag ni Biden si US Vice President Kamala Harris nga “Vice President Trump”.
Bisan pa sa nagkataas nga pressure kang Biden, determinado gihapon siya ug nagpabilin nga dili siya moatras ug miinsistir sa iyang kaangayan sa pagserbisyo isip Presidente sa Estados Unidos karon ug sa sunod nga 4 ka tuig.
Giinsistir usab ni Biden nga anaa siya sa maayong kahimsog ug ang labing kwalipikado nga kandidato aron pildihon si Trump.
Mahinumduman nga ang iyang edad ug performance sa miaging presidential debate niadtong Hunyo 27, 2024 batok kang Trump, kinsa nakonbikto sa mga kasong felony, nahimong sentro sa nagkadaghang pagsaway ug pagkondenar sa kandidatura ni Biden.
