Gipagawas na sa Department of Agriculture ang Final Bulletin kalabot sa El Nino Phenomenon nga unang miguba sa tibuok nasud gikan sa ulahing bahin sa 2023 hangtod sa sayong bahin sa 2024.
Basi sa Final Bulletin, niabot sa P15.30 bilyones ang natumbok nga danyos sa kinatibuk-ang paglungtad sa El Ni o diin moabot sa 333,195 ka mga mag-uuma ug mangingisda ang apektado.
Samtang anaa sa 270,855 ka ektarya sa agricultural areas ang nadaot, ingon man ang pagkawala sa produksiyon miabot sa kinatibuk-an nga 784,344 MT.
Naglangkob kini sa 330,717 Metric Tons (MT) nga bugas, 327,310 MT sa mais, 112,681 MT sa high value crops, ug 2,320 MT sa cassava o kamoteng kahoy.
Sa mga humayan, 109,481 ka ektarya ang naapektuhan sa kinatibuk-ang 2,137,046.77 ka ektarya nga natamnan.
Sa bahin sa mais, 131,787 ka ektarya ang giila nga apektado. Katumbas kini sa 11.96% sa gitamnan nga 1,101,695.90 ka ektarya.
Sumala sa DA, ang El Ni o nakaapekto sa kinatibuk-ang target sa produksiyon sa Pilipinas sa tanang industriya.
Dugang pa sa taho sa ahensya nga nakapagawas kini og mokabat sa P14.54 bilyones nga hinabang alang sa mga apektadong mangingisda ug mag-uuma.
Ubos niini nga kantidad, P8.59 bilyones gikan sa Rice Farmers Financial Assistance (RFFA), P4.72 bilyon pinaagi sa production support pinaagi sa mga regional offices, P659.17 milyones pinaagi sa inputs, ug ang uban pinaagi sa crop insurance, loan, donated animals. , ug uban pa.
Ang maong kadaot giila gikan sa mga rehiyon sa Cordillera Administrative Region (CAR), Ilocos Region, Cagayan Valley, Central Luzon, Calabarzon, MIMAROPA, Bicol Region, Western Visayas, Central Visayas, Eastern Visayas, Zamboanga Peninsula, Central Mindanao, Davao Region, Soccsksargen ug Caraga Region.
