BANGLADESH-Nagmaya nga gisaulog sa mga taga-Bangladesh ang resulta sa ilang gipahigayon nga lihok-protesta kini gumikan sa paspas nga pagkanaog ni Prime Minister Sheikh Hasina.
Gawas sa Prime Minister, wala usab nagpakita sa publiko ang mga pipila ka mga kaubanan ni Hasina lakip na ang mga local government official sa Bangladesh nga miresulta sa pagkabungkag sa parlyamento.
Kung kahinumduman nga mibutho ang kagubot human nagprotesta ang mga estudyante agi’g pagsupak sa government job quotas nga miresulta sa kamatayon sa gatusan ka mga magtutungha.
Gumikan niini miresulta kini sa pagpaningil sa hustisya pinaagi sa pagluwat sa katungdanan ni Hasina isip Prime Ministro sa Bangladesh.
Sa pakighinabi sa Bombo Radyo Cebu kang Cherry Ann Chishti, Bombo International Correspondent sa Bangladesh, gisaysay niini nga gusto sa mga nagprotesta nga ihulip si Nobel Peace laureate Muhammad Yunus isip chief adviser sa interim government nga mao’y nagpasiugda sa micro-finance lending nga nakatabang sa pagpauswag sa ekonomiya.
Tungod niini, gipanglantawan sa mga Bangladeshi nga mas molambo pa ang ilang ekonomiya ubos sa dumala ni Mohammad Yunus.
