METRO MANILA-Gidakop sa National Bureau of Investigation-Special Task Force ang 12 ka mga Chinese nationals tungod sa online scamming, serious physical injuries ug serious illegal detention sa usa ka indibidwal nga midumili sa pagtrabaho isip scammer.
Sa pamahayag sa NBI, matod sa reklamante, gipugos siya sa pagtrabaho isip online scammer sa mga opisyal sa Room 1168 Century Peak Tower, Ermita, Manila, apan giingong nibalibad siya tungod kay gikulata siya ug giatake sa mga Chinese nga kriminal.
Gibayran pa ang biktima og tunga sa milyon nga ransom apan nakabayad lang kini og P300,000 dayon gibuhian ug gihulga nga patyon kung mosumbong sa mga awtoridad.
Ang biktima niasoy sa iyang nahibaw-an bahin sa online scamming operations sa grupo maong nagpahigayon og surveillance ug verification ang mga operatiba.
Niadtong Agosto 6, nagpahigayon og operasyon ang mga awtoridad aron i-serve ang warrant ug dinhi nasikop ang mga suspek nga insik tungod sa ilang online scamming activities.
Ang mga Chinese nationals giila nga sila Xie Dong Da, Yang Hang, Yu Shuan, Raymond Lau Lik Wan, Chai Ming How, Zhang Long, Ke Lin Chen, Jiang Ming, Ou Shou Zhou, Li Shi Jie, Wang Chao Jie, ug Gan Chang Fu.
Kalabot niini, sumala ni NBI Director Judge Jaime Santiago, gipasaka na ang reklamong kalapasan sa Cybercrime Prevention Act of 2012, Serious Physical injuries ug Serious Illegal Detention batok sa mga suspek.
