PROVINCE OF CEBU-Mihatag og katin-awan kabahin sa kasong wala pagbayad sa utang sa usa ka langyaw nga banko si Cebu Provincial Governor Gwendolyn Garcia atol sa press conference niini sa Cebu Capitol Social Hall kagahapong adlawa, Biyernes Septiyembre 20, 2024.
Matod pa sa gobernadora nga wala kiniy kalabotan sa iyang kapasidad isip public official tungod kini nga utang nahitabo niadtong panahong wala pa siya sa gahum ug nagpadagang pa siya sa iyang patigayon nga GGC Enterprises nga nakabase sa Ormoc City.
Dugang pa niya nga makadaot kini sa imahe sa Sugbo tungod siya man ang gobernadora nga nagdumala sa probinsya maong nanghinaot kini nga dili hilabtan ang iyang personal nga mga kakulian hilabi na sa naasoy nga kaso.
Sa habig sa abogado sa gobernadora nga si Atty. Alex O. Avisado Jr. atol sa pamahayag niini nga nangatarungan sila nga ang hukom dili angay ipatuman tungod kay ang kaso dili aktibo sa kapin sa usa na ka dekada.
Kahinumduman nga ng desisyon sa Korte Suprema giproklamar niadtong Disyembre 4, 2023 apan gipagawas lamang sa miaging semana, nga nagmando kang Gobernador Gwen Garcia nga mobayad og pribadong loan sa Hongkong and Shanghai Banking Corporation (HSBC).
Nitumaw kini nga kontrobersiya dihang gibasura sa Korte Suprema ang petisyon ni Garcia batok sa alias writ of execution nga giisyu sa Makati Regional Trial Court niadtong 2012 diin gimandoan siya sa korte nga magbayad ug $700,000 nga danyos sa HSBC, nga adunay 12 porsyento nga interes sukad tuig 2000, kauban ang mga legal fees.
Sa laing bahin, gipadayag usab ni Garcia ang iyang kasagmuyo sa isyu nga gigamit sa mga political vloggers, partikular na sa mga sakop sa Diehard Duterte Supporters (DDS) group, aron makamugna og panagbangi tali nila ni Bise Presidente Sara Duterte-Carpio.
