CEBU CITY-Nagsaulog sa International Coastal and Underwater Clean-up Day 2024 ang nagkadaiyang Local Government Units (LGUs) sa probinsya sa Sugbo kagahapong adlawa sa Sabado, Septiyembre 21, 2024.
Ang dakbayan sa Lapu-lapu pormal na naglusad sa SCUBASURERO “SIBOT MAN” project sa Marigondon Wharf aron sa paglimpyo sa maong dapit sa pagtagad sa kinaiyahan.
Gitambongan ang maong aktibidad sa nagkadaiyang departamento sa kagamhanang dakbayan sa Lapu-lapu lakip na ang presensya sa mga nasudnong ahensya sama sa PNP, BFP, Philippine Army, Philippine Navy, Philippine Coast Guard, ug uban pa.
Samtang sa dakbayan sa Sugbo, nagpahigayon pud kini ug City-wide Clean-up Challenge sa mga dagkong suba sa dakbayan sama sa Mahiga Creek (uban sa pakig-alayon sa silingang dakbayan sa Mandaue), Estero de Parian, Kamputhaw River, ug Guadalupe River.
Samtang sa dakbayan sa Mandaue, nagpahigayon pud kini ug Coastal Clean-up sa Ouano Wharf sa Barangay Centro nga inubanan sa mga personahe sa Cebu Port Authority, Philippine Coast Guard, ug mga volunteers.
Gawas niini, nagpahigayon pud sila ug Bamboo Planting sa kapin 1,200 ka mga tanom nga kawayan sa Mandaue Green Learning Center, ang kanhi dumpsite sa basura sa dakbayan ang mga pipila ka personahe sa kagamhanang dakbayan isip pagsaulog sab sa World Bamboo Day 2024.
