CEBU CITY- Gimando ni Police Col. Antonietto Cañete ang City Director sa Cebu City Police Office (CCPO) sa kapulisan sa Dakbayan nga ipatuman ang police visibility aron maminosan ang krimen sa Cebu City.
Sa ekslusibong pakighinabi sa Bombo Newsteam kang Col. Cañete, gitino sa opisyal nga tahas niya ang mas halapad nga presensya sa kapulisan sa dakbayan aron sa pagpugong sa krimen.
Dugang pa, nga dako kini og tabang aron sa pagsulbad sa kriminalidad ug pagtuman sa tahas sa kalinaw.
Gihatagan ug gibug-aton sa opisyal nga dili lamang presensya sa kapulisan ang iyang palambuon, apan hasta na usab ang pagsumpo sa giingong ‘petty crimes’ sa mga komersyal nga establisyemento ug mga dagkong kadalanan sa dakbayan ug ang sa pagdaghan sa mga manlilimos sa kadalanan.
Awhag usab sa opisyal sa publiko, nga ipadayon ang supporta ug pakig-alayon niini sa kapulisan aron sa hingpit nga kalampusan sa seguridad ug kalinaw sa dakbayan.
Kung kahinumduman nga si Cañete maoy nihulip kang Police Col. Ireneo Dalogdog, kinsa nabalhin ngadto sa Regional Investigation and Detective Management Division (RIDMD) sa Police Regional Office (PRO)-7 nga kanhi pwesto ni Cañete.
