Gipahugtan sa Philippine National Police (PNP) ang seguridad sa Shariff Aguak, Maguindanao del Sur, nunot sa kagubot nga nahitabo sa kataposang adlaw sa pag-file sa mga kandidato.
Basi sa report nga gipagawas sa PNP, usa ka community watchman ang namatay ug unom ang naangol human sa kagubot.
Mipatim-aw sa imbestigasyon nga nagsugod ang kasamok human giingong wala aprobahi sa Commission on Elections ang usa ka kandidatura pagka bise mayor tungod sa pipila ka komplikasyon sa balaod.
Giingong nagkagubot ang mga dumadapig sa kandidato ug girespondehan dayon sa mga sakop sa Shariff Aguak Municipal Police, Police Regional Office-Bangsamoro Autonomous Region, ug ubang local security forces.
Nunot sa maong kagubot, ang PNP nidugang og mga personahe sa pipila ka posibleng flashpoint area sa tibuok Shariff Aguak.
Samtang, matod ni Comelec Chair George Erwin Garcia, adunay warrant of arrest ang kandidato nga gustong magpapili pagka-bise mayor.
Human siya ma-verify, nasuta sa secutiy force nga nag-atubang siya og warrant busa gi-serve dayon kini samtang nisuway pa sa pagsang-at sa kandidatura nga nakapasuko sa iyang mga supporter.
Gipasabot ni Garcia nga walay COC ang nahisgutang kandidato kondili ang certificate of nomination and acceptance (COC) lamang gikan sa usa ka political party, maoy iyang gibitbit hinungdan nga wala siya natugutan.
