MABINAY, NEGROS ORIENTAL- Gihikay na sa mga otoridad ang pagpasaka og kaso batok sa usa ka 40-anyos nga lalaki nga midagmal sa usa ka 13-anyos nga babaye pinaagi sa paghapak sa iyang nawong og bato ug nisuway sa paglugos kaniya sa Barangay Campanun-an, Mabinay, Negros Oriental.
Nahitabo ang insidente pasado alas 6:00 sa buntag niadtong Martes samtang paingon sa eskwelahan ang dalagita dihang kalit lang giguyod sa suspek nga giilang si Nelson Nasario paingon sa tubohan.
Duha ka lalaki nga estudyante nga naglakaw luyo sa biktima ang nakasaksi sa pagdagit.
Hinungdan nga ang duha ka mga bata daling nangayog tabang sa mga Barangay Tanod, kinsa daling niresponde ug naabtan ang bata nga babaye sulod sa lungag nga gibana-banang usa ka metros ang gilawmon.
Gikataho nga si Nasario nigugol og duha ka buwan sa pagkalot sa lungag.
Ang dalagita nadiskubrehan nga wala na ang iyahang sayal, ang iyang pang-ibabaw nga uniporme na-ablihan na ang batones, ug adunay daghang samad sa nawong human siya gidakdakan sa suspek gamit ang usa ka bato.
Sa interview sa Bombo Radyo Bacolod kang Police Lt. Stephen Polinar, Public Information Officer sa Negros Oriental Police Provincial Office, gikumpirmar niini nga sa tabang sa lokal nga mga pulis, barangay tanod, ug CAFGU, nadakpan ang suspek mga alas 3:00 sa hapon niadtong Martes.
Gipaabot pa sa mga otoridad ang resulta sa medico-legal nga eksaminasyon aron masuta kon ang suspek nahilabtan ba sa biktima.
Gibutyag usab ni Polinar nga si Nasario napriso na kaniadto tungod sa paglugos sa iyang kaugalingong anak nga babaye gikan sa kanhing kaminyoon.
