Nakurat si Albay Rep. Joey Salceda sa pagsipa sa rice inflation bisan pa sa kasamtangang pagkunhod sa taripa.
Atol sa hearing sa “Murang Pagkain Supercommittee” o Quinta Committee, nakurat kini sa taho sa Philippine Statistics Authority nga nisaka ngadto sa 9.6 porsiyento ang inflation sa bugas niadtong Oktubre.
Matod ni Rachel Lacsa sa PSA, halos dili pa mabati ang pagkunhod sa taripa diin ang presyo sa regular-milled rice anaa sa 50 pesos ug 22 centavos matag kilo, gikan sa 50.90 pesos niadtong Hulyo.
Hinungdan nga duda ni Salceda nga ang mga rice cartel lang ang nakabenepisyo sa pagkunhod sa taripa ingon man sa mga importer.
Matod sa magbabalaod nga importante kuno nga imbestigahon nga imbes adto sa savings sa gobiyerno, ang resulta sa pagkunhod sa taripa mahimong pahimuslan kini sa mga importer ug pagmaniobra sa presyo.
