CEBU CITY-Pormal nang gi-inagurahan sa Cebu City Police Office (CCPO) ang bag-o ug renovated nga istasyon sa Carbon Police Station 5 sa Barangay Ermita ning dakbayan sa Sugbo kagahapong adlawa sa Sabado, Nobyembre 30, 2024.
Gipangulohan ang maong inauguration nila Cebu City Mayor Raymond Alvin Garcia, CCPO City Director PCol. Antonietto Cañete, Station Commander PMaj. Erwin Abrasado, City Administrator Kristine Batucan, City Councilors, Jocelyn “Joy” Pesquera, Joel Garganera, Noel Wenceslao, Pastor Jun Alcover, ug JP Labella.
Ginama kini sa recycled container shipping van ang maong detention facility ug adunay kini duha ka detention facility para sa babaye ug para pud sa lalaki, anaay front desk kung asa ang desk officer ug anaay opisina para sa mga mag proseso og police clearance.
Kung kahinumdoman nga naglisud ang Police station 5 sa dili igong pasilidad apan karon gihatagan na kini sila og pag tagad pinaagi sa pagparenovate sa ilang istasyon.
Sa eksklusibong pakighinabi sa Bombo Newsteam kang PMaj Erwin Abrasado, ang Station Commander sa naasoy nga Police Station diin matod pa niya nga dako kinig tabang ang kabag-uhan sa lang istasyon ingon man aron sa mas episyente nga pagbuhat sa ilang trabaho.
