Gikumpirmar ni Quad Comm Lead Chairman Rep. Robert Ace Barbers nga aduna nay partial committee report ang Quad Committee sa Kamara human sa 12 ka pagdungog sa isyu sa extrajudicial killings ug war on drugs campaign sa administrasyong Duterte ug mga ilegal nga kalihokan nga naglambigit sa Philippine Offshore Gaming Operators o POGO.
Matud pa ni Barbers nga tawgon og “progress report” ang nasangpit nga report tungod kay magpadayon ang imbestigasyon bisan pa sa Christmas break.
Dugang pa niini nga unod sa progress report naglakip sa mga rekomendasyon ngadto sa mga hingtungdan nga ahensya sa gobyerno kalabot sa mga indibidwal nga angay pasakaan og kaso ingon man ang gisugyot nga balaudnon.
Gitataw ni Barbers nga ila untang aprobahan ang report sa plenaryo tungod kay adunay mga isyu nga angayan nga aksiyonan dayon ug ang maong mga output sa Quad Comm nahisgotan na usab pag-ayo.
Naglaum usab si Barbers nga ma-certify ni Presidente Bongbong Marcos nga dinalian ang mga balaudnon nga ipadayon sa dili pa matapos ang 19th Congress, lakip ang pag-amendar sa Comprehensive Dangerous Drugs Act of 2002.
Kining maong katin-awan, kon ang majority sa plenaryo mosuporta sa progress report, magsilbi kini nga senyales nga kinahanglang ilakip kini sa priority legislation.
Ilang gitarget usab nga ipadayon ang pag-aprobar sa dili pa ang Christmas break aron makatutok sila sa ubang isyu sa ilegal nga drugas ug EJK.
Ug gikonsiderar sa mega-panel ang pormal nga pagtapos sa mga pagdungog sa POGO.
