Gimanduan ni President Ferdinand R. Marcos Jr. ang pagpatuman sa balaod ug anti-corruption entities sa pagpahigayon ug mas gagmay, apan mas lapad nga mga operasyon batok sa Philippine Offshore Gaming Operations (POGOs) nga naglihok gihapon sa Pilipinas.
Matod sa Presidential Communications Office (PCO), ang Presidente mihimo sa direktiba sa ikaduhang Joint National Peace and Order Council (NPOC)-Regional Peace and Order Councils (RPOCs) meeting 2024, sa Kampo Crame.
Saysay sa PCO, gusto sa Presidente nga palig-onon sa Philippine Anti-Organized Crime Commission (PAOCC), Philippine National Police (PNP), ug Criminal Investigation and Detection Group (CIDG) ang ilang kampanya batok sa POGO, bisan pa sa pagdili sa operasyon niini.
Hinungdan, nga gimanduan usab sa Presidente ang mga local chief executives nga makig-alayon sa Department of the Interior and Local Government (DILG).
Kini aron sa paggukod sa mga POGO sa ilang hurisdiksyon, ilabi na sa mga LGU nga adunay katakos sa pag-ila sa mga kadudahang kalihokan sa ilang komunidad.
