CENTRAL VISAYAS-Nipadayag sa ilang kabalaka ang usa ka grupo sa mga pediatrician sa Central Visayas karong bag-o lang gumikan sa nagkadaghang kaso sa dengue sa rehiyon.
Kung diin, si Dr. Ellaine Nielo sa Philippine Pediatric Society Inc. Central Visayas Chapter (PPS-7) bag-o lang mipaambit nga ang Central Visayas nakatala sa pinakataas nga ihap sa mga kaso sa dengue gikan Enero 1 hangtod Nobyembre 9, 2024, milabaw sa National Capital Region, nga adunay 33,651 ka kaso, base sa datus gikan sa Department of Health (DOH).
Sa laing bahin, si Dr. Ronald Limchiu, gikan gihapon sa PPS-7, niingon nga ang Pilipinas adunay pinakataas nga kaso sa dengue sa mga nasud sa ASEAN sukad niadtong Nobyembre 16, 2024, nga adunay 304,860 ka kaso, gisundan sa Indonesia nga adunay 202,012 ka kaso, ug Malaysia nga adunay 106,773 ka kaso.
Kadaghanan sa mga kaso gikan sa mga bata nga nag-edad 6-10 nga naglangkob sa 1,000 ka mga kaso; gisundan sa 688 ka mga kaso gikan sa edad nga 1-5; 614 ka kaso gikan sa 11-15 anyos; sunod nga 597 ka mga kaso nga nag-edad og 21 anyos pataas; unya 323 ka mga kaso gikan sa edad nga 16-20; ug 76 ka mga kaso ang nag-edad ubos sa 1 ka tuig.
Kung kahinumduman, nga sa nakalabay nga bulan gipangandaman na usab sa Cebu City Medical Center (CCMC) ang posibleng pagdaghan sa mga pasyente sa dengue sa dakbayan sa Sugbo.
Kini maoy gipahibalo ni Dr. Anton Oliver Reposar ll, ang Assistant Chief of Hospital sa CCMC sa eksklusibong pakighinabi niini sa Bombo Newsteam.
Matod ni Dr Anton nga tungod sa pagsaka sa kaso sa dengue sa dakbayan sa Sugbo, gidugangan nila og mga hospital bed ang dengue ward sa CCMC ug aduna usab silay fast lane sa mga kaso sa dengue aron mapadali ang ilang pag-atiman sa mga pasyente nga adunay dengue.
Giawhag usab niini ang mga ginikanan nga kung adunay hilanat ang ilang mga anak, ipa-check-up dayon sa mga health expert o doktor aron masuta kung dengue ba kini o dili.
