Giseguro sa Philippine Army ang hugot nga pagbantay batok sa posibleng pagpanghulga sa mga rebeldeng komunista atol sa eleksyon.
Kini bisan pa sa anam-anam nga pagkunhod sa gidaghanon sa mga rebelde ug hingpit nga pagkabungkag sa daghang mga front sa armadong organisasyon.
Matud ni PH Army Spokesperson Col. Louie Dema-ala, nga magpabiling alerto ang mga sundalo sa pagmonitor sa posibleng impluwensya sa mga rebelde sa eleksyon, apil na ang pagpanghulga sa mga komunidad, ug ang namatikdan nga pagpangilkil sa mga kandidato.
Sa nangaging mga eleksiyon, gimonitor sa PH Army ang mga paningkamot sa mga rebelde sa pagpangita og pondo gikan sa mga kandidato.
Bisan pa niini, gipasalig sa Army colonel nga wala na’y katakos ang mga rebelde nga makabalda sa umaabot nga piniliay ilabi na nga wala na silay nadawat nga suporta gikan sa mga komunidad ug mga kandidato.
Basi sa datus sa PA, usa na lang ka guerilla front ang nagpabilin ug padayon nga gimonitor.
Samtang, gipasalig usab ni Col. Dema-ala ang kaandam sa PA nga mutabang sa pagmonitor sa tibuok 2025 midterm elections.
