BAIS CITY, NEGROS ORIENTAL- Dakong kalipay ang gibati ni Bais City, Negros Oriental Mayor Luigi Marcel Goñi sa kadaugan sa ilang contingents sa Sinulog 2025 Grand Parade and Ritual Showdown sa dakbayan sa Sugbo sa Awarding Ceremony niini sa Cebu City Sports Center kagahapong adlawa Lunes, Enero 20, 2025.
Mao kini ang pamahayag sa mayor atol sa eksklusibong pakighinabi sa Bombo Newsteam nga matod pa nga ang ilang performance kay giandaman lang nila og 30 ka adlaw o sulod sa usa ka buwan busa dakong pasalamat niya sa ilang mga dancers, choreographers ug trainors nga ilahang nakuha ang kadaugan.
Dugang pa niini, hilabihan ang ilahang kalipay gumikan kay kini ang ilahang unang higayon nga misalmot sa Sinulog Grand Parade hinungdan nga usa kini ka makasaysayanon nga kadaugan sa City of Bais.
Malipayon usab nga gipasigarbo sa Mayor ang supporta nga ilahang nadawat gikan kang Governor Chaco Sagarbarria ug sa tanang katawhan sa Negros Oriental ilabi na sa Bais.
Iyaha usab nga gipasigarbo ang paghangop sa mga Sugbuonan kanila, hinungdan nga Ilahang nahiaguman ang kahugyaw sa kapistahan nga gipahinabo sa dakbayan sa Sugbo.
Sa dihang gipangutana, kung mosalmot paba sila sunod tuig, nitubag ang Mayor nga kung hatagan sa kahigayon mosalmot sila uban gihapon ang ilang mga dancers, choreographers ug trainors.
Ang Bais City kay mipasundayag sa ilang Festival of Harvest sa Sinulog Grand Ritual Showdown niadtong Dominggo Enero 19 diin sila nidaog isip 3rd Placer sa Street Dancing
nga adunay premyo nga P500,000 ug Champion sa Free Interpretation Category nga mag-uli sa kantidad nga P3-milyones.
