Andam ang Trade Union Congress of the Philippines (TUCP) nga motabang sa gobyerno sa Pilipinas sa paglusad og ‘unified response’ aron matabangan ang mga undocumented Filipinos sa US, dungan sa inagurasyon ni US Pres. Donald Trump.
Matod ni TUCP Vice President Luis Corral, andam ang grupo nga makigtambayayong sa administrasyong Marcos aron ilusad ang tukma ug dinalian nga plano alang sa transisyon sa mga Filipino nga nakabase sa US.
Kini alang sa mga gustong mopadayon sa pagpabilin sa US aron ipadayon ang ilang American Dream, ug sa mga gusto na nga mobalik sa Pilipinas.
Dugang pa ni Corral nga dul-an sa tunga sa milyon nga undocumented nga mga Filipino ang nag-atubang sa posibleng hulga sa mass deportation sa US ug kinahanglan silang bantayan.
Sa samang higayon, girekomendar sa TUCP ang pagtukod og inter-agency body aron mahiusa ang tanang paningkamot sa matag ahensya sa gobyerno ug civil society organizations.
Matod niya nga mas sayon kung adunay hiniusang tubag aron matabangan ang tanang Pilipino sa US.
Sa mensahe sa inagurasyon ni Trump, gipasidan-an niya nga sa una nga adlaw sa iyang administrasyon, magsugod ang pag-aresto, detensyon, ug diresto sa pagdeport sa mga dili dokumentado nga mga imigrante.
Sumala sa Department of Migrant Workers (DMW), gibanabana nga 370,000 ka undocumented Filipino immigrants ang anaa karon sa US.
