Laing sunog ang miulbo sa amihanang Los Angeles, California kagahapon sa buntag adlawng Miyerkules, oras sa Amerika.
Ang pinakabag-o nga wildfire gitawag nga Hughes Fire nga miulbo sa Lake Hughes Road area duol sa Lake Castaic, 40 milya gikan sa Eaton ug Palisades wildfires nga miguba sa mga bahin sa LA sa sayong bahin sa Enero.
Sulod sa pipila ka oras, dali nga mikaylap ang kalayo ug sumala sa California Department of Forestry and Fire Protection, mga 9,400 ka ektarya ang naugdaw.
Gumikan niini, gipatuman na ang mandatory evacuations ug warnings tungod sa paspas nga pagkuyanap sa sunog.
Sa usa ka news conference, ang mga opisyal sa Los Angeles County nagtaho nga kapin sa 31,000 ka mga tawo, labaw pa sa kinatibuk-ang populasyon sa Castaic, gimandoan nga mobakwit pagkahuman sa mga pasidaan nga gipagawas tungod sa “immediate threat to life” sa sunog.
Anaa sa 25,000 ka mga tawo ang naa sa mga sona nga gipailalom sa mga pasidaan sa pagbakwit.
Gipaningkamotan nga mapalong ang nagdilaab nga kabukiran pinaagi sa pag-spray sa tubig ug mga fire suppressant gikan sa eroplano.
