LAPU-LAPU CITY, CEBU-Nasikop ang usa lalaki nga high value individual atol sa gipahigayon nga buybust operation sa station 4 sa Lapu-Lapu City Police Office nga gipangulohan ni Police Major Eraño Regidor sa Sitio Kapaping, Barangay Basak sa dakbayan sa Lapu-Lapu.
Diin giila ang suspetsado sa alyas nga “Owe”, 32-anyos, nga taga Basak-Eskwelahan, Barangay Basak sa naasoy nga dakbayan apan lumad nga taga lungsod sa San Remegio probinsya sa Sugbo.
Nakuha sa mga operatiba ang mga dagkong putos nga adunay sulod nga gituohang shabu nga motimbang sa 200 gramos nga adunay standard drug price nga P1,360,000.
Basi sa impormasion nga nakadawat sila og taho gikan sa kasaligang tinubdan nga namaligya og illegal nga drugas ang suspetsado mao nga ila dayon kining gipaubos sa validation.
Human nakompirmar ang taho giplano dayon ang anti-illegal drug operation nga miresulta sa pagkasikop sa suspetsado ug pagkasakmit sa mga pinutos sa gidudahang shabu.
Matud ni Police Lt. Col. Christian torres, ang tigpamaba sa LLCPO sa gihimong background investigation nasuta nga ang tinubdan sa supply sa illegal nga drugas ni Owe naggikan sa usa sa prisohan nga nahimutang sa Metro Cebu ug ihatod lang kini sa iyang gipuy-an ug siya na ang mo-bahin-bahin alang sa pagbaligya niini.
Subay niini, giandam na ang kasong kalapasan sa Section 5 ug 11, Article II, Republic Act 9165 batok sa suspek. | Bombo Rexmond Omega
