Gitudlo isip bag-ong national director sa Miss Universe Philippines Organization si Miss Universe 2013 3rd runner-up Ariella Arida.
Kini gipahibalo dungan sa presentasyon sa mga opisyal nga kandidato sa Miss Universe Philippines 2025.
Ang 69 ka opisyal nga mga kandidato sa Miss Universe Philippines 2025 gipaila, gahapon Sabado, Pebrero 15, atol sa press launch sa mga kandidato.
Diin ubay-ubay nga mga beteranong beauty queen ang misalmot sa maong pageant, apil na niini si Miss Cosmo Philippines 2024 Ahtisa Manalo, Bb. Philippines 2022 Chelsea Fernandez, Miss Philippines Earth 2023 Yllana Marie Aduana, Reina Hispanoamericana Filipinas 2019 Katrina Llegado ug Reina Hispanoamericana 2017 Winwyn Marquez.
Ang modaog sa prestihiyosong pageant maoy morepresentar sa nasod sa international stage sa Miss Universe 2025 nga ipahigayon karong Nobyembre 21 sa Impact Muong Thong Thani Arena sa Bangkok, Thailand.
Samtang, andam na usab ug naghinam-hinam na si Miss Universe Philippines 2024 ug ang kasamtangang Miss Universe Asia nga si Chelsea Manalo nga mopasa sa korona ngadto sa mopuli kaniya.
