MANDAUE CITY- Mihatag og 100 ka mga fire extinguishers ang buhatan sa Mandaue City Disaster Risk Reduction and Management Office (MDRRMO) sa mga bukirang barangay sa ilang dakbayan.
Kini nahisubay sa padayong paningkamot sa buhatan sa pagpalig-on sa kaandam sa matag barangay sa pakigbatok sa sunog karong panahona.
Ang mga nadalitan nga mga barangay kay mao ang Barangay Canduman, Casili, Cubacub, Pagsabungan, Basak, Jagobiao, ug Tawason.
Gawas sa mga fire extinguishers kay gitagaan pud kini og megaphones ug medical jump kits aron pag-abag sa mga emergency response sa ilang mga barangay.
Kabahin kini sa kalihokan sa MDRRMO sa Fire Prevention Month nga nagtinguha nga mapaabot ang kahibalo ug ekipo sa matag barangay aron mas paspas ug episyente ang ilang pagresponde sa sunog.
Padayon ang kagamhanang dakbayan sa Mandaue sa pagpangandam ug pagpalig-on sa disaster preparedness aron masiguro ang kahapsay ug kaluwasan sa mga residente.
