CEBU CITY-Nasikop sa kapulisan sa dakbayan sa Sugbo ang laing duha ka giingong sakop sa Nadera gun-for-hire group sa Paradise 3, Barangay Kinasang-an niadtong Marso 24.
Diin ang mga suspetsado mao ang giingong mga kauban ni Jerson Tapere, kinsa gipresentar kaniadto ni Cebu City Police Office (CCPO) chief Police Colonel Enrico Figueroa.
Nadakpan sa kapolisan ang giingong mga kauban ni Tapere nga giila nga sila si Rostom Sanchez Sialana, 25-anyos, ug Kian Labitad Dumasig, 18-anyos.
Ang duha ka lalaki ang subject sa follow-up operation nga gipahigayon sa Brgy. Kinasang-an human sa pagsulay-pagpatay kang Rodolfo Dumasig Jr., niadtong Sabado sa hapon, Marso 22.
Giila sa mga otoridad nga si Tapere ang gunman samtang sila si Rostom ug Kian giingong maoy mga spotters o lookouts.
Matud ni Police Lieutenant Colonel Maria Theresa Macatangay, ang deputy city director for operations sa CCPO, nga basi sa gun-for-hire matrix sa duha ka grupo, ang mga otoridad nagtuo nga aduna pay mga armado ug posibleng bag-ong mga indibidwal ang mopuli sa ilang pwesto.
Gumikan niini, magpabiling lig-on ang kapolisan sa dakbayan sa Sugbo sa ilang kampanya batok sa kriminalidad, apil na ang Oplan Bulabog ug mga operasyon nga nagtumbok sa mga indibidwal nga naghupot og dili lisensyadong mga armas.
Gibantayan na karon sa CCPO ang mga posibleng target sa sunod nilang follow-up operations sa umaabot nga mga adlaw.
